സെറീനയുടെ ബ്ളോഗിൽ നമ്മൾ നനയുമ്പോൾ

     (1)
ഈ മഴയിൽ
നില്ക്കുമ്പോൾ
നമ്മൾ കുളിരുന്നു
വരണ്ടു പോയ
നമ്മുടെ ഹൃദയങ്ങൾ
നനഞ്ഞു കുതിരുന്നു
പല മഴയായി
ഇത് നമ്മിലൂടെ ഒഴുകുന്നു

ഇടമുറിയാതെ
പെയ്യണേയെന്ന്
നമ്മുടെ ഹൃദയം
ആശയുടെ മഴയിൽ
നനയുന്നു

      (2)

ഈ മഴയിൽ
നില്ക്കുമ്പോൾ
നമ്മൾ വിയർക്കുന്നു
ഓരോ തുള്ളിക്കും
എന്താണിത്ര മൂർച്ചയെന്ന്
നമ്മുടെ ഹൃദയം പിടയുന്നു

ഹൃദയം മുറിയുന്ന വേദനയാൽ
മഴയിലേക്കു്
നമ്മൾ മിഴികൾ അടക്കുന്നു

       (3)

ഫിനിഷിങ്ങ് ലൈനിൽ
എപ്പോഴും മഴയാണ്‌

സെക്കന്റിന്റെ
നൂറിലൊരു അംശത്തിൽ
ഞങ്ങളെന്ന് ഞങ്ങളെന്ന്
ചിത്രങ്ങളും വാക്കുകളും
നിർത്താതെ പെയ്യുന്നു.

        (4)

ഒറ്റ മഴ
ക്യാമറ കൊണ്ട് എഴുതിയ കവിത
അക്ഷരം കൊണ്ടും!


(സെറീനയുടെ ഒറ്റമഴ എന്ന ബ്ളോഗിലൂടെ മഴ നനഞ്ഞു പോയപ്പോൾ...... )                                                                                    

                                                                               ....................യറഫാത്